Ka Daniel Seopa
Moletši – Bagologolo ba boletše ba re “Tloga tloga e tloga kgale, modiši wa dikgomo o tšwa natšo šakeng”. Seo se iponagaditše mafelelong a beke, ka la 23 kgweding ya Phupu, ge masogana a e tšwa ka makata’ namane, a namela dithaba go ya go wela dikomeng tša Moletši tša ngwaga wa 2025, go thopa bonna. Tšona di buletšwe semmušo ke Mošate wa Moletši ka tlase ga bogoši bja Kgoši Kgabo Moloto III ka Sebele.
Go ya le ka setšo sa se Afrika, Koma ke sekolo sa setšo seo se tšwelago pele go hlompja le go latelwa go tloga mengwageng ya kgale. Komeng ke mo masogana le makgarebe a welago ka sehla sa marega, ka nepokgolo ya go thopa bonna le bosadi.
Hlogo-phethiši ya dikgokaganyo tša mafarahlahla ka kantorong ya Mošate wa Moletši, Lelatela Moloto, o boditše Limpopo Insider gore, seemo sa dikoma tša Moletši ke sa go kgahliša mahlakoreng ka moka.
Moloto o re; “go ditshepedišo ka moka tša dikoma, re šomišana le mantona le batswadi go netefatša gore tshepedišo ya koma e ba ya makgonthe. Rena le diteišene tše pedi, go sa mathomo ke mo re netefatšago gore ngwana, pele a wela komeng, re ikgokaganya le batswadi ba gagwe, go kgonthišiša gore ba tsebišwa. Seteišene sa bobedi ke mo batswadi ba fiwago monyetla wa go romela ditokomane tša bona tša boitsebišo le go saena ditokomane tša go dumelela ngwana go wela komeng”.
Go ya le ka Moloto, Mošate wa Moletši o netefaditše gore o šoma monwana le lenala le mmušo ka tlase ga kgoro ya tša Pušo-tirišano le merero ya magoši. Seo ke kgato ya mathomo ya go tla go kgonthišiša gore tshepedišo ya dikoma ke ya maleba ebile e bolokegile.
O tlaleleditše ka gore; “pele dikoma ka moka di ka bulwa ka mo profentsheng ya Limpopo, Molekgotlaphethiši wa kgoro ya tša Pušo-tirišano le merero ya magoši, Basikopo Makamu, o kopanatšhitše batšeakarolo ka moka, go ba fahloša le go ba lemoša ka ga tshepedišo ya dikoma. Magareng ga melao yeo re e filwego, ke wa go netefatša gore baditi ga ba kitimiši batho le go ba betha ka dithupa mo ditseleng.”
Mošate ore o ya go šomišana le bahlankedi ba kgoro ya maphelo go rulaganya gore dingaka tša mmušo di thuša ka go aba ditirelo tša maphelo go bao ba wetšego komeng.
Baetapele ba dikereke, beng dikgwebo le baetapele ba dihlopha tša dipapadi, ba memilwe kopanong kgothe-kgothe ka Mošate ka la 25 Phupu, go tla go šogana le kgwekgwe ya taba ya tšhomišano-mmogo sehleng se sa dikoma.
Dikoma tša ka tlase ga Moletši tjeo di lego molaong ke koma ya Moletši Mošate, Ga Semenya, Ga Phaudi, Ga Rankhuwe, Ga Sechaba le Mmamadila.