By Staff Reporter
POLOKWANE – Kgorotseko ya Polokwane ka profentsheng ya Limpopo e ahloletše monna wa mengwaga ye 56 bophelo ka moka kgolegong ka la pedi kgweding ya Phupu, ka ge a pharilwe ka molato wa go kata. Yena o be a šoma bjalo ka mohlankedi wa tša thušo ya pele ka Polokwane, nakong ya ge a tla kata lekgarebe la mengwga ye 14 gola Seshego.
Mahlabiša dihlong a, a tšeere karolo ka ngwaga wa 2023 nakong ya ge mmonwa molato wo a hlasela le go phaya theto ka kgang lekgarebe leo, nakong ya ge le tšola diaparo tša sekolo le go apara tša gae. Go begwa gore motšwasehlabelo o ile a leka go hlaba mokgoši wa sebatakgomo eupša sekata seo sa mo tšhošetša ka la gore ge a ka tlaleya tiragalo yeo o tla mo iša ga maotwana hunyela. Monna wo o be a tsebja ke ba lapa la bo motšwasehlabelo bjalo ka mogwera.
Le ge go le bjalo, motšwasehlabelo o ile a tlalela molato wo go batswadi ge ba boya gae letšatšing leo la tiragalo. Molato wa go kata o ile wa bulwa setišeng sa maphodisa sa Seshego mo o ilego wa beiwa tafoleng ya ba lekala la Tšhireletšo ya bana le melato ya go tlaišwa ka tša thobalano.
Morago ga go tšwelela pele ga kgoro ya tsheko, mgononelwa o ile a lokollwa ka peila efela moragonyana a lahlelwa ntlongleswiswi morago ga dinyakišišo tša go tsenelela.
Mmoleledi wa maphodisa a Limpopo Colonel Malesela Ledwaba o hlalositše pegong gore Mokomišenare wa maphodisa Lieutenant General Thembi Hadebe, o lebogišitše maphodisa ka mošomo wo ba o dirilego go kgonthišiša gore letsogo la molao le laroka karolo ya lona. Hadebe o lebogišitše motšwasehlabelo wo ka go kgona go phula sekaku tiragalong ya go katwa.