Ka Charlotte Lekgothoane
Ga-Molepo – Badudi ba Ga-Rampheri ba re ba nyaka toka e phethagale gore dipolao le di dihlorišo tša basadi di fele. Se se latela morago ga masetlapelo a polao ya go garola matswalo ya lekgarebe la mengwaga ye 34, leo le hweditšwego le kgamathetše ka gare ga sediba sa madi motsaneng wa Ga-Rampheri. Pego ya Maphodisa e utulla kgonono ya gore, lekgarebe leo le bolailwe ke molekani wa lona wa mengwaga ye 43 ka mokibelo wa letšatši la 19 Mosegamanye.
Mmoleledi wa maphodisa a Limpopo Colonel Malesela Ledwaba o hlalositše pegong gore, maphodisa a Mankweng a golegile monna wo morago ga gore a longwe tsebe ka ga tiragalo yeo ya go kweša bohloko.
Ledwaba ore “motšwasehlabelo o hweditšwe a lahlegetjwe ke bophelo, ka mabadi a go kgaroša tiragalong ya bosinyi. Go gononwa gore bobedi bo bile le dikgakgano tšeo di hlotšego gore monna a hlasele molekani wa gagwe ka sebetša se bogale le go mo tlogela ka dikgobalo”.
Ledwaba ore mogononelwa o lahletšwe ka diseleng tša maphodisa gomme molato wa polao o butšwe. Dinyakišišo tša maphodisa di tšwela pele ka nepokgolo ya go utulla dinhla ka moka molatong wo.
Mogononelwa o tšweletše pele ga kgoro ya tsheko ya Mankweng ka la 21 kgweding ya Mosegamanye. Tsheko ya molato wa gagwe e šutišeditšwe go la 28 kgweding ya Mosegamanye go kwa ge eba o tla hwetša beila.