By Daniel Seopa
Moletsi – Go hlwele go foka moya wa lethabo le ditebogo ge dialoga di goroga gae ka mokibelo wa la 19 Mosegamanye 2025. Tša Moletsi dialoga di amogetšwe semmušo ke komiti ya dikoma ka Mošate wa Moletsi, moletlong wa kgoparara wo o rulagatšwego le go etellwa pele ke Kgoši Moloto wa boraro. Le le bile letšatši la bohlokwa ka ge go ketekwa gore dialoga di boile di phela ntle le dihlotlo le ditšhitišo.
Palomoka ya dialoga tše 889 di kgonne go wela dikomeng tša Moletši tša ngwaga wa 2025 ka Katlego.
Maloko a lapa, baetapele ba setšhaba le batepele ba setšo ba kopane go thekga dialoga ge di boile ka katlego di tšwa go thopa bonna. Baetapele ba komiti ya ka mošate go šeditšwe dikoma, ba lebogile ka fao dikoma tša lenyaga di sepetšego botse ka gona. Ba hlohleleditše dialoga go ba le maitshwaro, hlompho le seriti bjalo ka maloko a setšhaba a go ba le maikarabelo.
Ge a be a efa polelo ya go amogela dialoga, Kgoši Moloto wa boraro o ba hlohleleditše go ba banna ba makgonthe.
Kgoši o re “Mašoboro ke bona ba utswang, monna-nna oa hlompha a tseba bophelo, a šireletša mosadi, a šireletša le bana. Monna ke go kgotlelela, ao re ka gore o hloka mmereko wa re go kaone ke ipolaye ke bolaye le bana, yeo ke bošilo, ga ra letela go bona tša mohuta wo go tšwa go lena banna. Eyang le be mohlala go ba bangwe,”
O lebogile le batswadi ba dialoga ka go ba le kgotlelelo gomme o ba hlohleleditše gore ba se thibele bana go wela dikomeng.
“Go batswadi ba rena, lesang bana ba latele setšo sa bona, koma ke setšo sa ga bo rena. Ke sa re ga ba boya nah!?”