Ka Daniel Seopa
Burgersfort – Molekgotlaphethiši wa kgoro ya dipapadi, bokgabo le setšo ka Profentsheng ya Limpopo, Jerry Maseko, o lemošitše barutwana gore ge ba ka ipeya kgole le hlorišo ya madila le diokobatši, ba ka ikagela bokamoso bja go phadima. Maseko wo a bego ale seboledi sa letšatši, o be a swere barutwana ba mphato wa marematlou ka lefoko mabaleng a dipapadi a Motodi, ka masepaleng wa Fetakgomo-tubatse ka la 26 kgweding ya Phupu, modirong wa go hlola temošo go barutwana ka ga menyetla ya mešomo elego 2025 Tubatse Career Expo.
Dikemedi go tšwa go Makaleng a thuto ya godimo le dikhamphaning tša go fapana, di hlwele di e thekgile ka molelwana wa gore ‘Kodumela moepathutse, ga go lehumo le tšwago kgauswi’. Se se hlalosa gore, ge barutwana ba ka itima boroko ba šoma ka maatla dithutong tša bona, ba tla hlaba kgobe ka mootlwa ele ge ba atlega dithutong tša bona.
Maseko wo a bego a farafarilwe ke bahlankedi ba mmušo, o eleditše barutwana gore ba ntšhe mahlo dinameng go bokotsi bja diokobatši tšeo di ka ba senyetšago bokamoso. O re ‘hlogo ye meetsi e lotwa ke mong’ ele ge a gatelela go barutwana gore bokamoso bo ka matsogong a bona.
Barulaganyi ba modiro wo elego ba Career Exhibition Network, ba re barutwana ba go balelwa go 1,885 go tšwa dikolong tše 23 ka tlase ga masepala wa fetakgomo-tubatse, ba hlwele ba huma ka thuto le tshedimošo go tšwa go bahlankedi ba di yunibesithi, dikholetše, Makala a mmušo ga mmogo le a praebete.
Magareng ga dikolo šeo di kgathilego tema go akaretšwa sekolo seo se phagamilego sa Nkota, Phaahla, Sedibeng, Sengage, Seokgome le sa St Marks.
Khamphani ya go fehla mohlagase Eskom, khamphani ya go thuša batšwasehlabelo ba dikotsi tša mebileng ka mašeleng Road Accident Fund RAF, Unibesithi ya Limpopo, Yunibesithi ya Venda le tše dingwe tša batšeakarolo, di bile gona go sedimoša barutwana ba mphatho wa marematlou ka ga menyetla yeo ba ka e hwetšago ge fela ba ka itsotsoropa.
