Ka Daniel Seopa
Hlokego ya mešomo e tšwela pele go ba hloba boroko ye kgolo maphelong a baswa ka tlase ga masepala wa Polokwane. Ke ka fao baswa ba filwego maele le tshedimošo ya gore ba ikakatlele ka menyetla ya tša temo go lwantšhana le leuba la tlala le hlokego ya mešomo. Masepala wa Polokwane o hlwele o kopane le baswa le batšeakarolo mererong ya tša temo, modirong wa diponagatšo tša ditšweletšwa tša temo, wo o tšeerego karolo motsaneng wa Mandela, Ga Mašašane ka la 24 kgweding ya Phupu.
Modiro wo ke karolo ya molokoloko wa mananeo a masepala, a go keteka kgwedi ya baswa. Diboledi go tšwa mafapeng a go fapana, di šomišitše monyetla wo go abela baswa thuto le maele ka ga kgwebo ya tša temo.
Temo ke lekala la mothomo go Makala a mararo go akaretšwa, tša meepo le boreahlapi, ao a thušago go matlafatša mašika a ikonomi ya naga ya Afrika Borwa le go hlomolla naga mootlwa wa tlala le hlokego ya mešomo.
Ge a be a e fa polelo modirong wo, Mothuša’ Molaodi ka Masepaleng wa Polokwane, Lucas Tisane, o gateletše gore nepokgolo ya modiro wo, ke go šogana le thari ya hlokego ya mešomo go baswa, le go thuša go ba fahloša ka menyetla yeo ba ka itatswago menwana ka yona ka lekaleng la temo.
Tisane ore; “maikemišetšo a rena ke go fetola ka fao baswa ba lebelelago temo ka gona. Re duma gore baswa ba se bone temo bjalo ka mošomo fela eupsa ba e bone bjalo ka sebetša se maatla seo se ka šomišwago go thuša batho go iphedisha”.
Lenaneo le le kgatlampane ka tlase ga moeno wa go matlafatša baswa temong mo balemi ba tikologo ya Polokwane le dinaga mabapi ba kopanego le beng dikgwebo potlana, go abelana ka tsebo le tshedimosho.
Magareng ga dinhla tšeo di tantšego shedi go akaretšwa temo bjalo ka monyetla wa mošomo le ditsela tša ka fao balemi ba ka gwebišanago le mebaraka ka ditšweletšwa tša temo.